Tawong mawot asin igwang kusog na boot na makaaram asin maaraman an yaon sa saiyang kahiwasan nin pagkaaram. ​

Nagtutubod s'yang igwang limitasyon an pagkaaram nin huli kaini ginagalang niya an kadakulaan kan pagtataya siring sa pagkaaram. Alagad an pag-ako nya sa limitasyon bakong pagpundo kundi iyo an pagpahiwas kan saiyang pagkaaram.

​​

Nirururip nya an kababawan kan kararoman asin an kararumi kan kababawan.​

Inaaram nya an kadonongan kan mga madodonong siring man an kadonongan kan mga mangmang.​

​​

Totoo, sya sarong actualidad alagad an saiyang actualidad pano-pano nin posibilidad. An pagkayaon kan saiyang actualidad, pagkayaon man kan saiyang posibilidad.​

​​

Sinasabi na sya mayong pagtubod nin huli ta iba an saiyang pagkasabot kaysa sainda, kaya sya hinusgahan ninda.​

Alagad an sinasabi nindang mayong pagtubod iyo man an kararumi kan saiyang pagtubod, huli ta yaon sa posibilidad kan natura n'ya na magdolot sa sarong mas halangkaw pa saiya --- sa Yaon. Ining Yaon bakong limitado; siring man, huli ta sa saiyang limitadong tataramon, nalilimitaran man an boot ipasabot n'ya manunungod sa Yaon.​

​​

Sasaiyang pagdidiskurso nasasambitan n'ya an Yaon, gadan. Ini huli ta namimidbib kan iba an Yaon sosog sasaindang kagustohan. Alagad sa saiya ini Yaon huli ta namimidbid n'ya ini sosog sa pagpapamidbid sasaiya. Kaya, an Yaon nagpapaka-Yaon, nahihiling sa Saiyang pagpapahiling, asin namimidbidan sa Saiyang pagpapamidbid. Totoo harayo alagad an pagkaharayo ninda iyo an pagkakugos ninda sa lambang saro.​

​​

An gabos na ini na nasambitan nin huli sa saiyang kinamumugtakan. Dangan, an saiyang kamugtakan, kamugtakan sa bukas na sociedad.

​